بتجيلي رسايل كتير بتسأل عن علامات الحب عند الرجال، وشكل العلاقة الصحية اللي الواحدة تكمل فيها وهي مطمّنة. ففي حالة إنك لسه طالعه بخيرك من غِيط الأفلام والكتب الرومانسية، ومع كل اهتمام جديد من شخص، بتشوفيه بالبدلة البيضا أو السودا عل حسب نفسيتك، فأنا هجيبلك الخلاصة.
لما يكون بيكتب فيك قصايد غزل وكل يوم بينام على صوتك، وبينكم كل حاجه مُشتركة، ونفسه يسمّي نجمة في السما على اسمك، وبيوعدك تلفوا العالم سوا، كل ده لا يضمن إطلاقا إن النهاية هتكون تحت سقف بيت واحد للأبد أو حتى إنها تكمّل ٣ سنين قدام بسلام.
جمال البدايات في الحب ده سمة أساسية في أي علاقة غرام، ولأن الحب هو الوسيلة الأسمى لمواجة قبح الحياة اللي عايشنها والتغلب على الصدمات النفسية والخذلان اللي مرينا بيه طول حياتنا، فعصفورين الغرام بيكونوا شايفين قصتهم فيها حاجة حلوة مش موجودة في أي علاقة تاني. لكن كل لما بيكون الطرفين اختبروا تجارب قاسية في نشأتهم ولديهم رصيد من الوجع في التعامل مع البشر عموماََ، بيزداد طردياََ شكهم في صدق علاقة الحب اللي عايشنها.
ولو أحد الطرفين رومانسي بزيادة وعنده قليل من الثقافة، بيكون مُتابع جيد لسيرة الحب الملحمية بين المشاهير والشخصيات العظيمة اللي شكّلوا جلّ مفاهيمهم عن الحب والرومانسية. فتلاقي مثلاََ قصص العقاد وسارة، مي زيادة وجبران خليل جبران، فاتن حمامة وعمرو الشريف، فؤاد المهندس وشويكار، سامية جمال ورشدي أباظة، وغيرهم الكثير .
الناس ديه كانت جبابرة في الحب، وبرغم عِظم قصصهم وروعة جمال بداياتهم، لكن بتجمعهم صفة واحدة في الحب وهي إنه معقد جداََ. وهنا بيجي السؤال لأي شخص عنده أبجديات التفكير المنطقي:
إزاي الحب الكبير اللي اتولد ما بينهم يتحول لأطلال؟ وموضوع سبب نهاية الحب ده اتكلمنا عنه من خلال 3 كلمات في أغنية لأم كلثوم، ومش الأطلال. اقرأ المقالة الأول وارجع تاني.
عارفة إيه الحاجه الوحيدة اللي تضمن إن ديه علاقة تستاهل وقتك وطاقتك؟ إن ميجيش أصلاََ في بالك تستشيري حد في علاقتكم وتصرفاته وردود أفعاله، عشان أنت مؤمنة إنك مع الشخص اللي مهما كان عصي على البشر كلها في فهمه، قدامك بيبقى كتاب مفتوح، وأثبت بجدارة لا تقل عن ٣ سنين إنه معندوش صندوق أسود وخايف يشاركك بيه عشان ميتغيرش في نظرك، وإن الدنيا كلها في كفة وأنت في كفة تاني لواحدك.
لسه موصلكيش الإحساس ده؟ يبقى لإما تخليكي على البر وتستنضفي، أو تكوني مستعدة للقب مُطلقة وده شئ لا يعيبك، عادي جداََ! بس خليكي واضحة قُدام نفسك، إنك داخله علاقة عشان تعبانة من العيشة في بيت أهلك أو الوحدة في الحياة عموماََ وعايزة دفا في الحلال، أنت حرة!
هي حاجة واحدة بس اللي متسمحيش بيها، إنك تكوني ساذجة مغفلة وسايبه حد تاني سايق حياتك وبيملى دماغك باللي المفروض تِعمليه عشان متعنّسيش!
أرجوكي عنّسي وعيشي وحيدة بكرامتك، ولا تدخلي علاقة تشتهي فيها الموت مُنتحرة! بلاش نشر آمال على حِبال البدايات، واتعظوا من قصة إبليس يرحمكم الله.
كاتب فاتح شهية: مينا عطية
Photo Credit: twitter.com
0 تعليقات