ليه الحب الكبير ممكن يتحوّل بين يوم وليلة لرماد وأطلال؟
لما تسأل اتنين عشاق ليه مكملوش مع بعض المشوار، هتلاقي كل واحد عنده دواوين شعر حزين ووجع، ورصيد كبير من كلمات أغاني الفراق وهجر الحبيب اللي تخليه عايز يقطّع شرايينه، بس هو من جوا أتفه من كدا. ومهما قال وعبّر مش هيعرف يخليك تحط ايدك على مصدر الوجع بالظبط، لأن تجربة الحب اللي عاشها صعب يختزلها في سطرين موعظة.
ومع الخبرة والتجارب في سماع قصص الحب، هتجد نمط بيتكرر بين كل العشاق اللي بيكرروا ينفصلوا بإسم مشاكل كتير في العلاقة ما بينهم، لكن المُفاجأة إن مشاكل الحب كلها بتندرج تحت جملة بسيطة في 3 كلمات فقط!
في أغنية ظلمنا الحب للشاعر عبد الوهاب محمد، الراجل بيشارك وجعه على لسان السيدة أم كلثوم وهي بتختتم الأغنية بحسرة في الكوبليه الأخير. في أغنية مدتها ساعة تقريباََ، وكلام لمئ بالحسرة والوجع زي أي اتنين بيحكوا عن قصة الحب اللي انتهت ما بينهم. لكن بتدهشك جملة ثلاثية بتيجي في آخر بيتين من الكوبليه الأخير.
الست سكتت لثانية واحدة، أخدت نفس عميق، واتحفتنا لما جابت الخلاصة فقالت:
نِسينا رقة العاشقين.
يا إلهي! الجملة الثلاثية القصيرة ديه فيها حِكمة دسمة، مِحتاج تهضمها وتحفظها كويس قبل ما تعلن الحب على حد. حِكمة هتحاول دائماََ تفتكرها، وتتعهد قدام نفسك وحبيبك إنك متقعش في فخها وتئذي أكتر حد بتحبه في حياتك، لكن بكل أسف بتكون الجاني والقتيل في نفس الوقت.
بدايات الحب كُلها شاهقة بتهز الوجدان، قلوبنا بتبقى بِكر لسه بتتفتح بكلام الغزل، والهمس، واللمس، وإشارات العيون، والسهر لحد الفجر. وعبّر الشاعر محمود درويش بجملة شعرية بليغة عن جمال البدايات وقال:
ياحب لا أريد مِنكَ إلا البدايات
وده النوع السطحي من رقة العاشقين، اللي بكل تأكيد ضروري ولابد نتغذى عليه لصحة العلاقة العاطفية. لكن مش هو ده اللي يضمن نجاح أي علاقة.كل قصائد الغزل اللي تبادلتوها، وكل العهود اللي أخذتوها في لحظة ضعف واستسلام جميل، هي مجرد رد فعل هرمونات ولدّت مشاعر بهجة ودفا مؤقتة.
رقة العاشقين اللي بجد هي الرحمة والمودة في التعامل في وقت المشاكل اللي لابد منها! وده يتطلب معافرة وجهود مُضنية من الطرفين، إنهم دائما يحافظوا على التفاهم والصوت الواطي والتحكم في الإنفعالات وقت الاختلاف والمشاكل، مش وقت التسبيل وعيد الحب وأعياد ميلادكم! مينفعش طول السنة خلاف ومشاكل، والحب يكون محصور ومحجوز فقط لبضع أيام في السنة!
بمنتهى البساطة، عايز تعرف تاريخ انتهاء الصلاحية لأي علاقة عاطفية، بُص على طريقة كلامهم وتعبيرهم عن غضبهم وقت خِلافهم. لو مفيش "رقة العاشقين" أي المودة والرحمة حتى في أقصى حالات النزاع، يبقى عليه العوض في كل اللي كان.
ومن اليوم لازم تحضّر دكتوراة في كيفية الاستعداد للفراق، وعشان أنا بحبك بدون ما أعرفك، جهزتلك مقالة عن تخطي الحبيب والتعافي بعد الفراق، اقرأها من دلوقتي وطبّق كل كلمة فيها.
__
Photo Credit; albawaba.com
0 تعليقات