10 طرق لتعلم لغة جديدة في أسرع وقت | نصائح ومصادر تعليم اللغات

تعلُّم لغات جديدة أصبح طوق نجاة في الظروف الحالية. بمجرد إتقانك لأي لغة غير اللغة الأم بيتفتحلك أكتر من طريق للعمل سواء بالداخل أو الخارج، و بيمكِنك من فهم ثقافات مختلفة، والتواصل مع مُتحدثي اللغات الأخرى بشكل واضح أكتر,

يعني سواء كنت مسافر أو لأن تعلُّم لغات جديدة عمره ما هيخسرك. بالعكس هيعود عليك بالنفع و أي وقت هتقضيه و أنت بتتعلم حاجة جديدة فيه عمره ما هيكون وقت ضائع.

طب إزاي أقدر أتعلم لغة جديدة في وقت قليل و بأقل التكاليف؟ في السطور الجاية هنعرف اهم الخطوات لتعلم اللغة بشكل بسيط وسريع.

تحديد اللغة والهدف من تعلمها هي الأساس في تعلم اللغة:

أول حاجة محتاجين نعملها بعد تحديد اللغة إننا نكتب الأهداف اللي عاوزين نوصلها و احنا بنتعلم. بمعنى أنا عاوز أوصل لأي درجة من الطلاقة في اللغة عايز اتعلم محادثات بسيطة، ولا قواعد اللغة المعقدة؟عاوز ابقى قادر اكتب مقالات باللغة دي، ولا عاوز احفظ كلمات كتير عشان اقدر افهم أي جملة بدون الرجوع لقاموس؟

النقطة دي مهمة مش بس في تعلم أي لغة لا في أي حاجة عاوز توصلها لازم تكون عارف انت عاوز توصل لايه وليه؟ مهم جداً تفكر نفسك دايما إنت بتتعلم اللغة دي ليه عشان يفضل حافز ليك لأن مهم إنك تبدأ لكن الأهم إنك تكمل،و اكتب هدفك قدامك تشوفه كل يوم عشان متكسلش أو تنسى. 

واعمل لنفسك تقييم بإستمرار عشان يكون حافز ليك تكمل و تنبيه لو تكاسلت.

وبعد تحديد الهدف، هشارك الطرق ال 10 لتعلم اللغات بسهولة وفي وقت قياسي.

1- مشاهدة الأفلام الأجنبية لتعلم اللغة:

تعرف إنك وانت قاعد عامل فشار و بتتفرج على فيلم لطيف ممكن تلقط منه تعبيرات و كلمات جديدة؟ يمكن ده مش هيحصل من أول مرة تشوف الفيلم، بس مع تكراره مرة أو مرتين هتبتدي تلقط كويس، و مع تكرار الخطوات دي مع مسلسلات و أفلام مختلفة اللغة هتكون مألوفة بالنسبة ليك أكتر. وأنصحك بمشاهدة فيلم"Home alone" و التركيز مع حوار العيلة مع بعض، هتتعلم مصطلحات كتير و جمل تقدر تدخلها في كلامك العادي.

2- استخدام التطبيقات لمجانية لتعليم اللغات:

تطبيقات تعلم اللغة مثل: 

1. تطبيق Dulingo
2. تطبيق Babbel
3. تطبيق Memrise
4. تطبيق Tandem
5. تطبيق busuu
6. تطبيق Mondly

التعلُّم من خلالهم سهل جداً، و كل أبليكشن منهم له طريقتة الخاصة. في منهم اللي بيركز على الكلمات أكتر ، و منهم اللي بيركز مع الجُمل الشائع استخدامها، و معظمهم عليهم اختبارات قصيرة عشان تتابع مستواك و تشجيع في نفس الوقت. و في اختيار  إنك تدفع مبلغ مقابل إن الأبليكشن يديك مُميزات أكتر،  وممكن يتابع معاك مدرس كمان بمصاريف إضافية،و غيرهم كتير اختيارات معظمها مجاني و مفيد.

3- تعلم اللغات عبر اليوتيوب:

قنوات اليوتيوب كتير جداً و عندك إختيارات مختلفة و كلها مجانية كل اللي عليك تختار القناة اللي أسلوبها مريح و بسيط بالنسبة ليك و تبتدي تمشي في الحلقات أول بأول ممكن هنا تشوف تسع قنوات لتعلم الإنجليزية اللي من أهمهم قناة Learning English with Mr Duncan و English for you. 

وفيه كمان قناة عظيمة لتعلم الانجليزية من الصفر حتى الاحتراف اسمها Zamericanenglish. 

بالنسبة للألماني في قناة Learn German with Anja,

وفي مقال كامل فيه قنوات عربية لتعليم اللغة الألمانية.

بالنسبة للفرنسية، في قنوات كتير زي (قناة عربي بلسان فرنسي)و (قناة تعلم اللغة الفرنسية بالصوت و الصورة) و غيرهم تقدر تشوفهم من مقالة أفضل 10 قنوات يوتيوب عربية لتعلم الفرنسية من الصفر.

4- ممارسة كلمات اللغة الجديدة:

أي كلمات و مصطلحات جديدة إتعلمتها حاول تدمجها مع كلامك أو تتكلم مع حد من صحابك بيتكلم نفس اللغة أو بيتعلمها عشان متنساش، لأن ممارسة اللغة عامل مهم، ده هيخلي لسانك متعود أكتر و هتتطور أسرع.

5- المرح مع كلمات اللغة الجديدة:

إضافة شيء من المرح و الإختلاف في تعلُّم اللغة الجديدة؛زي إنك ممكن تبدأ تكتب الجمل والكلمات اللي بتتعلمها جديد على ملصقات، و تعلقها و عينك تبقى دايما شايفاهم. ده هيساعدك تحفظهم كويس و متنساش.

6- تعليم اللغة الجديدة للآخرين:

حاول تعلم اللي اتعلمته لأي حد حواليك. ده هيثبت اللي إتعلمته، من باب إنك بتساعد غيرك و بتساعد نفسك في نفس الوقت. لما بتذاكر لحد اللي ذاكرته كإنك بتذاكر مرة زيادة و لكن بإتقان و فهم أكتر. و هيثّبت معلوماتك و هيخليك مُتقن للغة الجديدة.

7- تغيير لغة موبايلك للغة الجديدة:

غيّر لغة موبايلك او جهاز الحاسوب للغة الجديدة اللي بتتعلمها في الأول هتبقى مش فاهم حاجة و لكن مع الوقت هتبدأ تدور على المعاني و هتستخدمهم كل ما تمسك موبايلك و بالتالي فإنت ضفت لقاموسك معاني جديدة و بتستخدمها يومياً مش محتاجة حتى مذاكرة،طريقة سحرية.

8- التأليف باللغة الجديدة:

حاول أول ما يكون عندك حتى لو حصيلة صغيرة من الكلمات و القواعد إنك تألف قصة قصيرة أو شعر أو تكتب تعليقات بسيطة على مواقف حواليك ده هيفرق معاك كتير،كُل ما هتمارس اللغة الجديدة بأشكال مختلفة كل ما مستوى طلاقتك في اللغة هيزيد و مستواك هيتحسن بشكل أسرع.

9- الميديا لتعلم اللغة الجديدة:

حاول تتابع برامج تليفزيونية باللغة الجديدة المطلوبة. و ابدأ اكتب المفردات الجديدة و هتقدر تلاحظ طريقة النطق بوضوح. ده غير إنك هتقدر تتعرف أكتر على ثقافتهم.

10- التركيز على مصدر واحد لتعلم اللغة الجديدة:

اختار مصدر واحد تتعلم منه، زي إنك هتتابع قناة معينة أو تذاكر من كتاب أو تدرس في معهد للغة أو تاخد كورس. وحدد مصدرك عشان ميحصلش تشتُت. لما تركز على مصدر واحد هتقدر تركز و تحس بالإنجاز. لكن لو عددت مصادرك هتحس إن تقدمك بطيء، فممكن يجيلك إحباط و متكملش. 

وفيه كتير من الطرق اللي ممكن تتعلم بيها و لكل لغة طريق مُختلف شوية. يعني مثلاً الإنجليزي مصادره كتير جداً هتلاقيه في كل مكان. و معظمنا بقى متأقلم معاه. أما لو جينا للألماني أو الفرنساوي الموضوع هيكون مختلف وأصعب شوية، لكن مش مستحيل. هي نفس التطبيقات على الموبايل، الفكرة في إنه صعب تلقط من الأفلام و المسلسلات أوي، هيحتاج يبقى عندك أساسيات في اللغة لأنها مش منتشرة ولا ودانك متعودة عليها.

و طبعا لو حابب تاخد شهادة تثبت إنك عديت مستوى معين في اللغة، يبقى لازم تلتحق بأي معهد معتمد زي معهد جوتة في اللغة الألمانية أو British Council في اللغة الإنجليزية.

نصيحة ختامية من الخبراء لتعلم اللغة الجديدة:

فيه نصيحة ختامية لتعلم اللغة الجديدة، هحطها لواحدها مستقلة عن ال 10 خطوات السابقة لأهميتها في التذكر واسترجاع المعلومات بسهولة. 

اربط الكلمات اللي بتتعلمها بصور لأن كده دماغك هتقدر تستقبلها أحسن و هتقدر تفتكرها بسهولة، وده بيفسره Hebb's law بإن الخلايا العصبية اللي بتتفرز في نفس الوقت بترتبط ببعض. علشان كده لما تربط الكلمات بصور في ذاكرتك هتفتكر أسرع و أحسن. كمان لو إتعلمت معلومات جديدة ومكنتش بتستخدمهم أو تكررهم، هتنسى 80% منهم في خلال شهر  واحد. عشان كده لازم تراجع باستمرار  اللي اتعلمته.

حاول تستخدم طريقة ال(Recalling)بدلاً من ال(overlearning)؛بمعنى إنك مش شرط تطول مدة المذاكرة بس، ارجع بعد ما تذاكر اكتب اللي حفظته، ده هيساعدك تكون فاكر أكتر بنسبة 35%.

ولما تبدأ تتعلم لغة جديدة اتعلم كأنك طفل. يعني ابدأ بخطوات بسيطة زي إنك تبدأ تتعلم الحروف و نطقها، و بعدين كلمات بسيطة، و بعدين قواعد من السهل للأصعب. و عشان تبدأ توصل للطلاقة في اللغة تدريجيا، ابدأ استغنى عن القاموس اللي بيترجملك للغة الأم، و استبدلها بالقاموس ال monolingual اللي بيشرحلك معنى الكلمة بنفس اللغة، ده هيبدأ يقوي مستواك.

يعني لو بتتعلم انجليزي تجيب قاموس (إنجليزي-إنجليزي) لو ألماني يبقى تجيب قاموس (ألماني-ألماني) و هكذا.

وتقدر تعرف أكتر عن المزيد من الخطوات اللي هتساعدك لتعلم اللغة من كتاب فصاحة للأبد وتلخيصه من الفيديو ده: 

وأخيراََ بعض علماء علم النفس بيقولوا إن 20 ساعة كافية لتعلُّم أي مهارة أو لغة جديدة. يعني تقريباً ممكن تحتاج لشهر واحد بس لو قعدت تتعلم كل يوم 45 دقيقة بتركيز شديد. ولكن أنا معتقدش إنهم كفاية لتعلُّم اللغة بعمق، و لكنهم هيفرقوا بشكل كبير ، وهتنجز أكتر,

قسِّم الجزء اللي عاوز تتعلمه صح ووزعه على وقتك الموضوع مش إنك قاعد بتدرس كام ساعة، القصة كلها في إنك تركز كويس في الوقت ده و تكون منظم، وتقسم المحتوى اللي هتتعلمه لأجزاء صغيرة قابلة للتنفيذ، متحطش اهداف مستحيلة في وقت قليل.

والأهم من إنكك تبدأ تتعلم لغة جديدة انك تستمر ، التحدي دايماََ في الاستمرار مش البداية. جون ماكسويل ليه مقولة عظيمة هنا: 

لايهم مدى موهبتك، ولا عدد الفرص التي أمامك. الاستمرارية هي سر النجاح.

ممكن تخصص ساعة فقط من يومك تتعلم فيها ده هيساعدك تستمر. اجتهد واسعىٰ و دايماََ فكر نفسك بهدفك، و مفيش حاجة صعبة ولا مستحيلة. اتأكد إن معرفتك لأكتر من لغة سلاح ليك، و مفتاح للثقافات التانية، و طريق شغل مفتوح دايماً سواء كان في مجال دراستك أو خارجها. 

معرفة لغة جديدة بيميزك دائماََ لنفسك أولاََ، ثم بين كل المحيطين بك. 

كاتب فاتح شهية: سارة خليل 
تحرير: مينا عطية